نبض الحب - أحمد العلوي
لو ذبحني اليوم حبك..بس تذكّر شيّ واحد
عشت أحبك طول عمري..ومت يالغالي أحبك
الجسد يفنى ولكن..يبقى نبض الحب خالد
وإن توقّف نبض قلبي..ماتوقّف نبض حبك
أدري إني في حياتك ياحبيبي أيّ واحد
مرّ في دنيا غرامك وماوصل لحدود قلبك
إيه أحبك وإنته تدري والدمع بالعين شاهد
إيه تدري وماتبالي..بس خليتك لربك
إجرح إحساسي وكابر..وإلعب بقلبي وعاند
مايهمك دام قلبي للأسف باقي يحبك
نار حبك تشتعل بي وقلبك إنته حيل بارد
مايحس بنار قلبن ضاع مابينك وحبك
يسألوني ليش أحبك؟..قلت مدري..بس وايد
يكفي إني أنسى نفس وأنسى كل الدنيا قربك
لو أشوفك في هدوءك تبتسم مرتاح جاعد
يبتسم بين الحنايا خافقن يرتاح جنبك
تدري إني من عرفتك..سارح بفكري وشارد
بس أفكّر فيك إنته ومنشغل هالبال بس بك
وإنته ماهمك شعوري..كلما جيتك تباعد
ياترى ذنبي أحبك..وإلا حبي صار ذنبك؟
المهم..لو متّ منك بس تذكّر شيّ واحد
عشت أحبك طول عمري..ومتّ يالغالي أحبك