بنت الخصال الصحيحة - العنود العلي
أرخيت شالي لك مَعَ هبّت النود
وتناثرت سود الجدايل طريحه
باحس في حرّيتي وانت موجود
وآفيض لك ما ترتكبه القريحه
خل الهوى عذري بلا شي منقود
دام الهوى للبنت عيب وْ فضيحه!!
محسوده فْحبك وفالحب محسود
وشهادتي في وصْف حبّك جريحه
مابيني وْ بينك مسافات وحْدود
مكانتك وسط الحشا مستريحه
قلبي معاليقه على حبّك شْهود
وعيني مدامعها لشوفك صريحه
تمرّني حلم وْ تناهيد وسْهود
وآمر بِكْ بنت الخصال الصحيحه
اتذكرك وآقول ماهوب مفقود
وآعيش بِكْ ضحكه .. وهرجه .. وصيحه..!!