معذوره - العنود العلي
شموخ العزّ لجنابك أقدّم أصدق اعذاري
وعذري إسمعه تكفا لأنّي صدق.. معذوره
أنا لا يمكن اتعالى عليك وإنت بي داري
وعذري برّر الموقف لأنّي كنت مجبوره
بربّ الكون أحلف لك وربّي عالم اسراري
ومثلك يغفر الزّله وتبقى الحال مستوره
أنا ما جيتك اتعذّر و أقطع معك مشواري
أنا جيت ابني بحبك ف دنيا العشق معموره
قصيدي لوأهو بيوصف حياتي و كامل اطواري
بتلقى روح(ن) تعزّك وقلب(ب) إنت دستوره
تراني من عقب صدّك حوتني أعظم اخطاري
هجرني حظّي الضّايع وانا بالحيل مذعوره
أعيف عمان من بعدك مع انّ عمان هي داري
وامنّي النّفس برجوعك واخاوي الصوت والصوره
ألا يا صمتي الفاضح ألا يا دفتر اشعاري
طلبتك رجّع الغالي لقلبي و جبّّر كسوره
علامك يا بعد راسي؟ علامك شاغل افكاري؟
خلاص انسى الزّعل واترك خطايا القلب وقصوره
لأنّّك كلّ ما أملك أنا اقدّم لك اعذاري
وتكفا يا غنات الرّوح رجّع للغلا نوره