انكساره - سيف بن سليمان

يا (بو عبالي) والمواني حزينة
لا تحزنك جيّات عاشق عبارة

اذا تذكّرها على ذات حينة
يرفع عيونه ويتنهّد زفارة

هذا السجين اللي عشق له سجينة
مابين شاشة والزراير وفارة

ما يذكر انّه لدّها بشوف عينه
لكن ع شوفتها يسوق البشارة

ياللي خذيتي كلّ ماضي سنينه
لاتْذكّريه بْكلّ لحضة مرارة

لا تذكري (العقبة) ورمل (السنينة)
اللي وصلها تحت ظرف الحرارة

وْ(تنعم) وذيك (الرايبة) والرزينة
وادي (السليف) اْذا انتهى في (كبارة)

ولاّ (الرّمل) وبيوت عرشة وطينة
ولاّ (الدبيشي) و(المسرّات) جاره

تشفق أذونه لصوت ريح السكينة
ولاّ عيونه يوم تنقع غباره

لا تستفيقي ذكرياته الكنينة
مجنون، يأتيها، وياخذ قراره

اسرع من البترول داخل مكينة
اللي يشبّ بْلمح قشط الشرارة

شوفيه واقف بين شاطي ومينه
كل اللّذي حوله: عمارة... وعمارة

الله يا شمس السحر بالمدينة
عند الفجر قطر الندى في بخاره

وْهذا البحر واصْوات موجه أنينه
والطير توّه ما غدا للصدارة

يمشي على الشاطي، بشوقه وحنينه
مكسور خاطر، والدليل انكساره

يدّينه بْجيبه ونزّل جبينه
وْقطّ العمامة فوق كتفه خسارة