المستوى السادس - سيف بن سليمان
يا المستوى السادس ومن عقبك دهر
وش فاد عالين الجرد عالي الجريد؟
لاصرت متوحد وزارتني العبر
عِبَر, لَكَن غير العبر شيٍ يزيد
في خاطري ويحدني على القهر
شوفة بني الاحرار لا صاروا عبيد
(علمت قلبي الصلح) طيبه من عطر
(لكن ذا قلبي خبل),قرم وعنيد
وينك يَ هتلر, وين صدام العصر؟
وينك يَ بو طالب علي وابن الوليد؟
راحوا, وانا شاعر مَ يتعبه السهر
حطاب ليلً ينشد الونة نشيد
اكتب من أشعاري سطر ينطح سطر
وارسم من حروفي صور وابدع واجيد
شاعر فقير وما يعيبه لو فقر
مهما فقر ولا عثر يرقد سعيد
ماني بِ من يهدونه الورده زهر
ولانِيِ بْرايد ولاني بالعميد
إللي لَخطّّف لازم يشغل خطر
وإللي لَ من مريت ينده له يِ سيد
لكن انا رجال لي فعل وأمر
ولا طرالي حق مارضى لي مزيد
ودعت (عبري) صوب (مسقط) بالفجر
واسريتها بالليل وعد بلا وعيد
شفت المواقف والدواعيس الخضر
ولا الزبد لي ع الشواطي... ما تفيد
مليتها من كثر ما اجيها عصر
فاكر مِنَ همومي بترحل او تحيد
يطرا ع بالي سيح به غاف وسمر
واذكر ليالي الود والقول المفيد
واشفق ع شوف الفاتنات ام الغمر
مايعرفن موضة ولا (فاشن) جديد
واحمس لدلة هيل والزعفر حمر
وارمس مَ بين القوم ذي الراي السديد
لكن تغير هالزمن واصبح عكر
واصبح كلام الحق يزعلهم اكيد
وامست ليالي الحب حرمتها سكر
الله يِفرج لا غدا قلبي حديد
سافرت لوني ما اسميها سفر
كل الاماكن من قريب ومن بعيد
كنْها تناديني ي (سيف) اصبر صبر
إلك المثل (ايوب)، اصبر لو زهيد
صبر الليالي ذي، عشر ضعفه عشر
عن سابق الايام فالوقت المديد
وختامها من اجمل وافضل ذكر
لا هي ذهب، لا ماس، لا عقدٍ فريد
الحمد لله, والثنى له, والشكر
وْصلاة ربي ع النبي الهادي المجيد