الصبر - ناصر الهاشمي

الصبر يا قلبي ترى الحب غربال
اللي بتلاه الحب واشيب حاله

لن غمضت عينه بقى الفكر يختال
ليله مضى ما بين همه وخياله

يا ما طريح مالهوى شاكي الحال
محدٍ سمع شكواه ولا حد صغاله

ما فادته عزوة بن العم والخال
لغير شوفة غيد قلبه صفاله

بالحاظ عينه صادني واشغل البال
وحبه سرى بي حيل حتى الثماله

واصبحت في دنياي هايم ورى اللال
عمري انقضى ما بين صده ونكاله

يا خوفتي من ويل شمت وعذال
يا حسرتي من حاملين المقاله

ضيعت حبي بين قيل واقوال
جرحتني وانا احسبنك دوى له

اللي يودك يرخص الحال والمال
ولي مصد عنك ما تجيبه العذاله

واوصيك يا قلبي عن الصبر تبدال
عسى ولعل تلين خلي حباله

الصبر ياقلبي ترى الحب غربال
واللي ابتلاه الحب يرثى لحاله