العيد - عابرة سبيل
العيد باكر وأسعد الله ممساك
والله مدري وين خدٍ جلسته
وين أنت يلي عيدنا في محياك
كف القدر من ضيقت الخلق بسته
من يوم ما لوحت لي كف يمناك
لليوم دمعي بالخفا ما حبسته
ومن يوم ما ذوقتني حر فرقاك
والياس زرعه في حياتي غرسته
شريت لي ثوبٍ على شان لقياك
والثوب راحت موضته ما لبسته
وشريت عطرٍ ما زهاني بلياك
أربع سنين بعلبته ما لمسته
ودفتر قصيدٍ كل يوم يترجاك
ما فيه يومٍ ما سهرت ودرسته