آخر موعد - عابرة سبيل
له موعد لاروح الليل وياي
أول وآخر موعد مع فتاته
اليوم ما تنفع دموعي ورجواي
اليوم تفصل عن حياتي حياته
اليوم يعطيني بقايا بقاياي
واعطيه انا ماشلت من ذكرياته
اليوم بابدل مشاعر حناياي
يصبح من اخواني وانا من خواته
اليوم يتركني لحالي بدنياي
مجبور يقفي لو يزيد التفاته
اليوم يخلف عن مماشيه ممشاي
والله ما أضمن من عذابه نجاته
لو اتعلق فيه ما ينفع ابكاي
خلاص فات الوقت واعلن فواته
اليوم بعطيه العزا عقب فرقاي
عندي خبر وش قيمتي في حياته
وانا العزا مابيه من كبر بلواي
ماينفع اللي عاش واعلن وفاته
يارحمة الله ساعديهم بسلواي
يعوضه الله بانكسار امنياته
اليوم ياهمي وياطول مسراي
يافرحة العذال وأهل الشماته