غصّه وإبتسامه - عبدالعزيز السبيّل

اسدل الليل مالك علم ياطير
يوم سمعي فقد نوح الحمامه

وين ابلقاك قلي../ ياعسى خير
خايف الليل من شدة ظلامه ؟

سقت رجلي وياكثر المشاوير
مالحقني معه غير الندامه

حالتي حلم مايحتاج [. تفسير .]
بس عيّا يزوره في منامه !

جرح حطيت له مليون تبرير
مانفع.../ قال:- خلّه للإقامه .!

كل ماجتني جروحه./ مسايير
فز قلبي وبادر بإهتمامه !!

ماكفاه الذي في حالي يصير
تدمع العين / وتشح الغمامه

كان يبغى العمر مامن.../ مخاسير
صرت كلي على شانه [. كرامه .] !!

إن توفى./ بياخذ معه تفكير
وإن توفيت./ مالي كود خامه

وكان وده فراقي يا.../ معاذير
ليه ؟ ينصب على صدري خيامه

والله إن اعشقه عشق المناعير
(. للوفا , والشجاعه , والكرامه .)

ماترك شئ./ حني يامقادير !
روّح الليل والباقي كلامه !!

وانت ياطير وين القاك ياطير
ماعلى العاشق الوافي ملامه

هذهي عاودتنا حزّه عصير
وهذا انا تلني نوح الحمامه

ضف جنحانك وودعني وطير
اسبق الليل لايسدل ظلامه

روح قلّه محبك حالته غير
راح وقته على عضة ابهامه

يكتبك شعر ويصخرك تعبير
بين/ دمعه وغصّه وإبتسامه !!

ولو يقول.../ ومتى ينسى على خير؟
قول له:- هو متى يوم القيامه ؟!

السلامه.. معه هات التباشير
بنتظر لين [. ترجع بالسلامه .] !!