لاتداويني - عبدالعزيز السبيّل
من قال :- ( يامنبع إلهامي ) تداويني
خلي جروح الهوى والشوق ل الذكرى
لاصارت جروحي اللي ساكنه فيني
اتحن قلبك علي / ياجعل ماتبرى !
جيتي وانا في غيابك أسألك ويني ؟
ي.. اللي لك ب وسط صدري مسكن ومجرى
وإن كان يطري عليك ( مصافح يديني )
آخاف مثل امس بس صافحتي يميني
وأسعدتي ايدي اليمين وغارت اليسرى !!
ولاصرتي قبال عيني وارمشت عيني
كنّي فقدتك شهر او عام ب الأحرى !
إشتقت لك حيل واشتاقت لك سنيني
واشتقت ل علومك ول السهر والمسرى
عطيني علومك وسمّي وسليني
سوالفك في كلام أهل الهوى أدرى
مابيني وبينك إلا بينك وبيني
يعني هلا في كلام الجادل الشقرا
ب ادين لك واللي يسددك ياديني
قصيدة ب اغتني منها يالو تشرى
وانا تميّزت في كثرة بساتيني
ب الحب ب الوصف ب الإحساس ب القمرا
بس ب حلاك القصيد إن قلت :- يمديني
يقول :- ب الوصف ( حاول مرتا آخرى ) !!
جيتي وكلي ظما لقياك واسقيني
وانتي عيونك ب شفّي / تكتب وتقرى
مافيه داعي أقول :- ارجوك اقريني
مكتوب في جبهتي ( ياعيشة قشرى ) !
وإن كان جيتي ل جرحي لاتداويني
خلي جروح الهوى والشوق ل الذكرى
ابحتفظ بـ الجروح ولاتخليني
وياجعل جرح يجيبك لي / مايبرى !!