تاخذ لك أيام - محمد البطحي
تاخذ لك أيام ماطمنتني ولا اتصلت
ياللي على طول .. مشغلني وهمي رضاك
تقسى وتبعد وتنساني وانا مازعلت
ماترحم الخافق اللي من حنانه عطاك
يالغايب اللي غيابك هدني وانشغلت
عايش مع الناس لكني بفكري معاك
ياللي تسللت في حدب الضلوع ووصلت
في موقع ٍ وسط قلبي ماوصله سواك
ماتدري اني من الاحزان والضيق شلت
شوف الغلا مات من قدامك ومن وراك
اقول ابنساك وان حاولت ابنساك قلت
وشلون ينساك قلب ٍ مذكر انه نساك
غير اللقا وبسمة اعيونك انا ماقبلت
اغليك واشتاقلك واللي ذبحني غلاك
ان جيتني تنحسب فرحة عمر وان رحلت
حرمتني فرحة ايامي وفرحة لقاك
وكانك تذكرتني مره وجيت وسألت !
يسعد صباحك على الجيه ويسعد مساك