بيني وبينك ! - محمد جارالله السهلي

يا قوّ صكات الحياه الشقيّه
حتى و لو انها تصيبك و تخطيك

يا صاحبي مني سلام و تحيّه
و منك البياض اللي يباري معانيك

مسموح لو ما جات منك الخطيّه
و ياعلّني ماذوق حزنك ولا ابكيك

و الصاحب اللي يفتخر في سميّه
ما يلحقه شك بسميّه تماتيك

و الخوه اللي بيننا سرمديّه
خوة عمر ماهيب ليله واخليك

ابوي وصاني عليها وصيّه
يقول : يا محمد و انا اقول : لبيك

خلّك خوي ٍ ما يخلّي خويّه
و لا ّ ترى يابوك ماحدٍ مخاويك

و شرواك يا شوق المها الغشمريّه
على المراجل ماخذٍ صك تمليك

مكانتك مابين هذي و ذيّه
و مواقفك عن فاخر المدح تغنيك

ادمح لك الزلات عشره و ميّه
على النقا و الشك زايل و انا اخيك

والحب مثل الارض و الجاذبيّه
لولاه ماني حيّ قدمك و احاكيك

له في خفوقي منزله و اولويّه
و كانك تبي باخذلك شوي و اعطيك

حتى تعرف الراحه العالميّه
و انواع الاستمتاع واللي يكفيك :

عن كل شي إلا غرام بدويّه
تاخذك من دنياك خلسه و تنفيك

لعالم ٍ مافيه يا كود هيّه
تسلمّك ملكه على راحة يدييك

و بيني وبينك و الليالي مديّه
الشعر ما سرّ الدهاه الصعاليك