سهول وإلاّ سبيع - محمد جارالله السهلي

يالله ثبتني .. على درب الهدايه والهدي
واغفر ذنوب ٍ فوق متني .. كل يوم أشلها

اسألك حسن الخاتمه لا جات لحظة موعدي
وأعوذبك من شر بقعا والصدور وغلها

واليا اجتهدت بماقفي طالبك لا يضيع جهدي
واسألك تمنعني من الزله قبل لا ازلها

وتعين رجليني بطاعة شايبي على العدي
وتزرع محبة خدمته في خافقي .. وأجلها

فإن طبت في خدمة ابوي اشوف طيبي بولدي
مثل .. مثل .. ما هيب لحية ليتها يا علها

وانك تثبتني .. على نهج المراجل لا .. غدي !!
حنا بزمن !! فيه الرجال الوافيه يا قلها

فالرجل لولا الدين والاخلاق والكف الندي
ما كنه الا الشجره اللي ما يظلل ظلها !!

والشاعر ان ما راوده الاحساس بانه مبتدي
يعمي الغرور عيونه ويكشف عيوبه كلها

وانا اعتبرت الشعر دمعه تسكن براحة يدي
أليا حزنت أهلها .. وأليا فرحت أهلها

واليوم هذا غير !! كن الشعر في كل جسدي
لا جف ريق أعذب بحور الشعر !! جيت أبلها

وفي مدحكم يا أهل الحفل يطيب موال الشدي
ومن شانكم تتسابق بيوتي عشان أهلها

انا انشهد الجلاّل ما فيهم ضعيف ولا ردي
لهم مكانه تبطي الردّيان ما تاصلها

لو كان ما فينا عضو ولا وزير ٍ في بلدي
من طيبهم نعقد حبال الواسطه ونحلها

ونيابة ً عن الرجال اللي كرمها سرمدي
اللي جمعتنا في ضيافتها وفي محلها

يا مرحبا ترحيبة ٍ من بيشه إليا الاحمدي
باللابه اللي سجلت كل الشرف بسجلها

سهول ولاّّ سبيع ولاّ سهيل وأخوه الجدي
ألا الوكاد ان كلهم واحد وانا فطن لها

فالجد ولا فالمكانه .. فوق .. فوق .. ومقصدي
عيينين في راس .. وقلوب الحاقدين نعلها

نطّاحة القاله هل الطاله كعام المعتدي
صفوة رجال اللي حكم شبه الجزيره كلها

مثل السحاب اللي ترزم واسبل وهلّ بردي
نارد على حوض المنيّه والسيوف نسلها

حتيييش لو درب العُلا صلف وصعيب وجرهدي
الله خلقنا للصعاب وللقمم نحتلها

إليا رضينا .. نفرش الدنيا بساط ٍ أحمدي
وإليا زعلنا .. تبكي عيون الخليله خلها

واللي يبي يفلح يقلدنا وفينا يقتدي
يعمل عمايلنا إذا هو قدّها كفو ٍ لها !!

حنا شرحنا للبشر معنى ( سنافي واجودي )
هذا طريق المرجله ياللي تبيها دلها

قوم ٍ لنا في صفحة الأمجاد تاريخ ٍ مدي
سلايل ٍ تغنيك دق فعولها عن جلها