حزن الفرح .. - محمد جارالله السهلي
ياكبر ذنب السؤال وياثقل دم الاجابه
لا انتهى حبك وصدرك مختنق بحروف ليه
وقتها كن خافقك جالي وحزنك شيخ لابه
اتصدد لكن الدنيا تحدك تنتخيه
يارفيق الهم علمني اذا عيني ربابه
منهو يسمع نزفها لامن نظرها ويحكيه
بسئلك بالله قلي عن شقا الدرب وسرابه
كيف علقني بكذبه باكر اوصل وارتويه
لو فقلب الليل رحمه مافتح للجفن بابه
وعشمه في حب نجمه يدري انها ماتبيه
ولو يضيق الكون بالطعنات تلقى بي رحابه
لاتعكر بال خنجر تركض ضلوعي تجيه
لايشيل الهم همه دام تجمعه القرابه
في صدر شاعر يعده واحد منه وفيه
له علي دامه يبيني مااخونه في غيابه
كان ماجالي اجي له يحتويني واحتويه
ولي عليه انه ماينساني ويصطفلي عذابه
ولا يعرضني لضحك صدق ماعاد اشتهيه
اقسى من حزني وهمي الفرح حضرة جنابه
لاطرى مايطري الا منهو عرفني عليه
ذاك من يحكي على عيني وتقنع باغترابه
لجل تعتق صورة فيني سجنت كل الوجيه
غايتي فرح الحزن لاينكسر بالقلب نابه
وخوفي لا حزن الفرح يخنق لي انفاسه بيديه
من ورى قلبي رسمتك غيم يحكي بوح غابه
كل غصن منحني فيها يمدله راحتيه
هاك صدري شوف بعيونك متاهات الغلابه
في شوارع هالحنايا كم متشرد نزيه
لاقبل عطف السنين ولارضى بسلم الذيابه
ماسئل كود الاماني يالاماني جاوبيه
ويش اقول وويش اخلي والبلاوي ماتشابه
غير لا قالت في قلبي لاحشى مالي شبيه
ليت في وجه الزمن ذرة حيا واحسب احسابه
احشمه لجل يحشمني دون شي احتريه
وليت شعري مايخيب هقوة اللي قد هقابه
لاتولج هاليمين وصحت فيها اكتبيه
وليت دربي لا نثنت رجلي يقدرني ترابه
كان وربي ما احاتي قولت ازرى ينتهيه
بعده يذبل اسمي بأخر دموع الكتابه
دام كل بيت بقصيدي شال دمعه مايليه
هذا انا ياصاحبي حلمي الاقي لي اجابه
لا انفجر صدري وضاقت دنيتي بحروف ليه