يامشعل - مطلق الجبعاء

البارحه ما هجعت الليل يا مشعل
والهم بالقلب سردادي ومردادي

هوجاس يقفي وهوجاس يجي مقبل
اصبحت منجوم لا عارف ولا قادي

الحزن بين الضلوع الاصعب الاسهل
صعب تفاديه ولكن سهل يزدادي

هم مسلح غزا خفاقي الاعزل
وشلون أبرقد وهمي حارب ارقادي

على وليف رحل ما قلت له يرحل
يبعد وانادي وأغص شوي وأنادي

أنا أعرفه زين ما يبغض ولا يزعل
ويغفر خطاياي لامن زدن بعنادي

هو ليه يوم العواذل جوه ما يسئل
وشلون فيني تسمّع هرج حسادي

مير المصيبه بعاده شي ما يعقل
غدا وانا صرت مثله بالدهر غادي

ماني مصدق يخلي دمعتي تنزل
وماني مصدق يعكر جوي الهادي

الصاحب اللي يشابه عوده المغزل
اللي نعومة خدوده تقهر الكادي

الحسن كله يجي من طرفه الاكحل
متسلم بالعذارى مركز قيادي

نقوة فؤادي كريم أخلاق ومكمل
لكن عسا الله يرجع نقوة فؤادي

بعض النوى يقتلك من دون ما تقتل
ياخوك قله ترا الظالم هو البادي

تنشد عن الحال شفت الحال يا مشعل
ما عدت أجامل وأرد بردي العادي