الحظ والدنيا ونوف - مطلق الجبعاء

الحظ والدنيا ونوف
صارو بحياتي مشكله

حظوظ خلق الله وقوف
وانا حظوظي مسدله

أملك فؤاد وسط جوف
مليان هم وأسئله

ورده حواليها عصوف
بأرض الغرام الممحله

والليل دمعات وخوف
والشمع منهو يشعله

توقف على شفاهي حروف
وأمهل كلامي وأهمله

واقول يا همي تطوف؟
يقول عندي مسأله

صعبه على مثلي يشوف
سود وساع مكحله

يا نوف عينك ما تروف
قلبي سهومك تقتله

انا على حبك شغوف
وانتي بحبي مهمله

هجرك مثل ضرب السيوف
وانتي غنوج مدلله

مصروفك اليومي ألوف
والشمس عنك مظلله

وانا سنيني ما تحوف
غير الفقر والاخيله

عودي على قلب لهوف
عمري بدونك مهزله

احن للوصل العزوف
والحال هجرك قلله

وش سبة البعد العيوف
يأخر غرامي وأوله

أموت لا مرت طيوف
الحب دمي حلله

مافيه داعي للحلوف
راضي بهرجك بأكمله

لا صار دربك للنكوف
اشعر بقلبي زلزله

الهم واقف لي صفوف
ينقض شعور ويفتله

قريت ممنوع الوقوف
على رصيف الامثله

هذي مراحل حب نوف
والهجر أصعب مرحله

قدمتها للي يشوف
وأبغى حلول المشكله