التوت - ناصر دهيم الدوسري
الارض جفت يوم وقّف مطرها
والشيّ لامن فات ماينفع الصوت
سهيت لحظه هايمٍ في نحرها
كنت احسب انه حلم ياناس ويفوت
في ليلةٍ ماينعرف من قمرها
جتني حياتي لين حسيت بالموت
لبا العيون اللي خذاني نظرها
وفديت خشتها من التوت للتوت
موسوعةٍ في الحب جيت اختصرها
لقيت عدوان الغلا وسط تابوت
عوبا وكن العين تخشى خطرها
ان عمّرت بيتين تهدم لها بيوت
ماجيت اعلمها الغلا وانتظرها
فرصه ويلقاها من الناس مبخوت
ان كانها المينا تراني بحرها
أشواقي المحار واحيان ياقوت
ليت الهبوب اللي تلاعب شعرها
تجعل غلاها بين الاضلاع منحوت
قمت آتكاثر شوقي اللي غمرها
أحبها مرات واشوتها شوت
غيري رحبها مير قلبي خسرها
نزَعْت باقيها مثل ما انْزع الكوت
عوّدت رجلي ما تطالع اثرها
والناس يشبعها قليلٍ من القوت
قصيدتي طالت وهذا قدرها
راحت وانا والله احبها موت