وراسك - نهى نبيل

وراسك منحنى راسي لمخلوق(ن) أبد غيرك
ولا بللت أنا ثيابي بدمعي غير منشانك

نسيت إني أنا ظللك وأنا شمسك وأنا طيرك؟
هدمت اللي يجمِِِعنا بكلمة قالها لسانك

أنا اللي تحفظك كلك وتفهم كل تعابيرك
أنا اللي سرها فرحك بكت دم(ن) بأحزانك

تشيلك من تعب وقت(ن) تمادى لجل تدميرك
وصارت مسكن عيونك لها إسمك وعنوانك

ويوم(ن) ماوهبك الله عيال(ن) خيرهم خيرك
أنا ربيتهم مثلك على طيبك وإحسانك

وصنتك لجل توصلني تفرحني بتباشيرك
وتتباهى بحسناتي مابين أهلك وخلانك

وكم أسهرتلي عين(ن) ذبحها طول تأخيرك
وإذا أقبلت هللت بك تبوح وتحضن أشجانك

بعد ذاك العطا قللي أمانة وش معاذيرك؟
وكيف تسد في وجهي حبيبي كل بيبانك؟

في عينك سر ماعرفه معني كنت أنا بيرك
غريبة في وسط روحك وأنا اللي كنت أوطانك

أبسأل ساعه الكلمة وش اللي صاب تفكيرك
وخللى عشرة سنين(ن) تموت اقبال أعيانك؟

حلفت براسك وماظن أحلف براس أحد غيرك
لأنه ماحترق قلبي وعمري غير منشانك

لأنك بس أبو عيالي أببقى قلبك وطيرك
ولابتطيح من عيني بكلمة قالها لسانك