معنى الابوة - أسعد الروابة

يمه دخيلك قولي لشايبك تبت
جعلي فدى طيبه وفدوى مشيبه

يا((حنيّنه)) من يوم صد وزعل شبت
ودموع عيني ع الوسايد رطيبة

جمر الندم عطب ضميري وتعطبت
ودلو المراضى مايوًصل جليبه

ادري به انه ينشغل باله ان غبت
وتضيق به كل الفجوج الرحيبه

الشوك لوّه ينشلع يوجع النبت
وهذا الشعور يغولني واحتمي به

مادام عينه تنشغل عني ان جبت
للعذر طاري وارتكى مادريبه

قولي له اني لايجٍ من ضحى السبت
تمرني اللحظات صعبة عصيبه

على كثر ماهو مسامح تعذبت
قولي له اني بالمنام اهذيبه

وقولي له اني مثل ذوب الشمع ذبت
توي شعرت بحرقته وبلهيبه

عرفت وش معنى الابوة وتأدبت
من بشروني بالولد ياحبيبه