المعجزة - خلف العبدالله
نواف انت المعجزه منت نواف
حطيت بعقول المخاليج حيره
اذهلت سامع فيك واذهلت من شاف
اسمك بكل لسان قاله وسيره
سموك يامزبان ياريف الاضعاف
سموك يادرع الليالي العسيره
سموك بكحيلان يانسل الاشراف
وايضا بعد سموك صقر الجزيره
مهما اوصفوا بك عددو كل الاوصاف
الوصف يقضي وبك وصايف كثيره
مواقفك غطت على كل ميقاف
حتى الفخر منك الفخر شال غيره
ياكاسبين الصيت من دور الاسلاف
جدك وابوك اهل السيوف الشطيره
نزيلكم والجار ماحافته حياف
شيوخ ولكم بيرق بكل ديره
سبحان خلاق الكواكب والسما لحاف
وانتوا لحاف الموزمه للعشيره
قبل النهايه لي وصاتين ٍ خفاف
اعني الدميم اللي نحور المغيره
علقوا وسام صدوركم باسم نواف
نصيركم زيزوم وانتم نصيره
ناف الوليده بكل عز وفخر ناف
بذراعه اخذها ماتذرا بغيره
كل من شهد له كاسب الصيت نواف
حتى الرضيع اللي يناغي بسريره
ماجبت من عندي تهاريج واحلاف
الحوت شرع بالبحور الغزيره
نواف برواز القصيد وجوهر القاف
الشيخ ابو ايهم بالشدايد سعيره
والديره اللي مابها شيوخ تنعاف
مثل السلاح اللي بليا ذخيره