أسمر اللون - عبدالعزيز الروابة

تعال واجبر خاطري ياسمر اللون
شفني جريح وجيت من قو باسي

ياصاحبي ماغيّر الوقت مجنون
مجنون حبك لو غدى الوقت قاسي

لاماخذتني عنك هقوات وضنون
لا مانسيتك في لذيذ النعاسي

ولا ابعدتني عنك ضحكات وعيون
ياعيون أمي وكل ربعي وناسي

جيتك مثل بحار خايف به يخون
هالبحر وانت رموش عينك مراسي

وجيتك أجّر بخطوتي كلي طعون
أبيك ترفع بين اياديك راسي

تعال نصفي صاحي ونصف مجنون
مذبوح واضحك غصب من قو باسي