الدمع والقنديل - عبدالعزيز الروابة
الدمع من داعب القنديل
قنصني الشوق برماحه
دوّرت أيده أبي منديل
أمسح عمى القلب وجراحه
شادن عبيره مسك مع هيل
خدّه ولا لون تفاحه
طبعه وكنّه أصيل الخيل
شبيه للبدر بالّلاحه
طيفه سجنّي وذقت الويل
ي غصون يكفيك ميّاحه
راح وتركني فريد الجيل
ماذقت من عقبه الراحه
كنّي بوادٍ حدابه سيل
أرعبني الحزن بصياحه
ناديت وينك ي نجم سهيل
ماشفت أبو عين ذباحه
لدّيت أسمع وحيف الليل
والصبح ياطول مرواحه
وقفت ماباقيٍ بي حيل
من عتمة الدرب وارياحه
غضّيت طرفي على ماقيل
هجّيت عن وحشة اشباحه
القلب نام وصحى القنديل
لليوم يحلم بمصباحه