وعد
لا تناديني حبيبي نادني باسمي حمد
ذاك اول وانتهينا كلمتك ذا الحين عيب

كان حظي فيك طايح وحظي بغيرك قعد
لو ملا ذا الكون صوتك صاحبك ما يستجيب

حاجتي قد جات عندك وانقضت قبلك سدد
من لقا شقر الأصايل عاف خلفات الحليب

غيمك اللي كان يغري شققه صوت الرعد
والأماني في سرابك قطّها وسط الجليب

من زرع بالطيب ارضه من ثمر طيبه حصد
ومن زرعها بالأماني ما جنا من ذاك طيب

دور وتلقى شبيهك لسمع صوتك عفد
ما تأثر لو تهينه والأمر ما هو غريب

كل همه وسط سوقك سهمه الخاسر صعد
عن جهل غامر بماله مادرى وين النصيب

راح ليلك ما سهرته واشرقت شمس السعد
راحت أيام الجهاله يوم سميتك حبيب

ما على من طال دربه المهم انه ورد
ومن حضوره لك سعاده يتعبك لما يغيب

اكتب اسمي الف مره واكتبه خان العهد
اسعدتني ذا العباره وانت منها مستصيب

يا زمن سجل حضوري لبدا صدق الوعد
لو على بيض النوايا صافحت يمناي ذيب