باني المجد - حمد بن عبدالله بن حذيف النعيمي
ان قلت ماتوفيك كل القصايد
وكل ٍ على معناه غنى وهنا
اختار وآخذ من حروفي فرايد
ولا يجي كيفي على ما تمنا
ياشيخ وصفك للبخيصين كايد
والقول له مدلول كيف ٍ وفنا
تغريني افعالك بيوم الشدايد
ويزهر على فعلك جديد المعنى
وارسم على الأوراق زين القلايد
واصبها في قالب ٍ ماتثنا
وآجيك ابارك في فرحها واعايد
حضور شخصي في قصيدي معنا
انت الأمير وانت للدار قايد
وباكثر من الثنتين شخصك يهنا
ومبروك يادار ٍ لأهلها عوايد
لهم زمان ٍ راح واقبل زمنا
من دونها كم طاح شبل وعايد
وسيوفهم من دونها كم كلنا
تشهد بها الوجبه علوم ٍ وكايد
والشقب مع خنور ما يستحنا
قوم ٍ تعاف النوم فوق الوسايد
من دون واجب دارها ماتونا
اليوم نجني من سلفنا الفوايد
ياقاسم بجنة نعيمك تهنا
واليوم صرح المجد مبناه نايد
ارسيت ساسه للحكم في وطنا
ويبقى حمد للدار قايد ورايد
واحنا بعينه شعب غالي ثمنا