أكبر خسارة - حمد بن عبدالله بن حذيف النعيمي
على القصايد ذنب واكبر خساره
ان كان ماجاتك بعيدك تهنيك
وان كان مافيها حياه وحراره
تموت في صدري ولا ودي تجيك
العيد له فرحه ونور وشعاره
تهدي ومن تهديه بالعيد يهديك
لو كانها كلمه بنفس العباره
عيدك مبارك غير من قلب يغليك
البارحه مريت حلمي زياره
كنك دريت اني تمنيّت اوافيك
يامرحبا والقلب حامي جداره
والليل واشعاري وشوقي يناديك
زاهي عليك اللبس حتى زراره
يامجمله بالزين لو هو مغطيك
عليك من خضر الغصون استداره
وان ملت شفت الناس قامت تحاتيك
واغار والغيره تزيد المراره
والذنب ذنبك يوم ولعتني فيك
وعليك من ظبي البراري أماره
لا والله الا غار من شبحته فيك
ولا بياضك فيه نفحة شقاره
والجيد الأتلع يخلف اللي يلاقيك
ياسلعة ٍ ماهي بسوق التجاره
يسوم روحه صدق من كان يبغيك
يا أجزل ابيات الشعر يا إثاره
يا أعطر انفاس الزهر وش يكفيك
ياليل هذا الكون لا يا نهاره
اصبحك بالخير ولا امسيك
ياسهرة اللي بالخلا شب ناره
وضوّا عليه الليل طيفك وطاريك
يا ترثة اسلوم العرب ياحضاره
في شكلك الظاهر ولا غاب ماضيك
واللي زرع في هيئتك من وقاره
شيخ ٍ على طيب المعاني مربيك
سلام ياقلب الوفا والطهاره
وعسى السعاده طول عمرك تباريك
صلّيت من خوفي صلاة استخاره
حتى ابري ذمتي يوم اغنيك