ان جيت - حمد بن عبدالله بن حذيف النعيمي
ان جيت بكتب لك قصايد واهنيك
جيتي على كل المعاني كبيره
وان جيت بقطف لك من الورد واهديك
اشوفها مدّه في حقك صغيره
شانك كبير وتوهتني موانيك
ولفّيت في بحرك جزيره جزيره
ورمتني امواجك على جال شاطيك
وعيّنت لك بالمجد منهج وسيره
يادار يشهد لك اذا قلت ماضيك
من يوم كنتي للحضارات ديره
اسمك أوال وأول الحب يعنيك
دانه ربت وسط البحور الغزيره
ياكثر من غاص البحر طامع ٍ فيك
وانتي على من لا هويتي عسيره
واسمك بعد دلمون وبه ناس تدعيك
عشق القلوب وحيرة الفكر حيره
والله ما ينلام من قال يبغيك
تخيري بين البصر والبصيره
واليوم يالبحرين عيشي لياليك
عيشي على عهد الرخا يا أميره
عهد الذي عاهد على العز يبنيك
واللي بحكم الشرع نهجك يديره
واللي بروحه لو طلبتيه يفديك
واللي بكل اشياك نفسه خبيره
لا تحسبينه بس توه يراعيك
من صغرته عينه بشوفك قريره
سلام يارمز الوفا يوم اطرّيك
كبر الجبال اللي توازي حفيره
واكبر ولا تلحق بأصغر معانيك
شامخ مقامك والمعاني قصيره
ملك ولك سيره ومنهج يكفّيك
مغنيك عن مدحي امور ٍ كثيره
حمد ولا من كل سمّى يجاريك
في عهدك البحرين قصه مثيره
تاهت دلال وخذتها بين اياديك
والبستها تاج الملوك الشهيره
جاتك عطا واسقيتها سيل واديك
ونخيلها من كبر مدّك نظيره
ذي جوهره في حبها من يباريك
الا هلك اهل السيوف الشطيره
جدّانك اللي بين هاذي وهاذيك
ساقوا عليها بالأصايل مسيره
عذرا ولا في عشقها أي تشكيك
تهناك وانت اللي لها جيت خيره
وعن لا يطول الهرج يا شيخ بعطيك
بالمختصر نفسي بفعلك اسيره