في قطر
الشعر لحان وقته تبتدين
والبدايه باسم ربي لا جحود

والله انك ياقطر تستاهلين
القصايد والهدايا والورود

شوفي الفرحه على عيني تبين
يوم عيدك ياعسى عيدك يعود

ياكثر منهم بحبك مغرمين
وما يلام اللي يحبك يالعنود

الغلا محفوظ من ذيك السنين
يوم جاسم بالعمر دونك يذود

يومها بالخيل ربعي حاضرين
لدعانا واجبك جينا وفود

انشدي سويحان كانك تجهلين
وانشدي خنّور من ذيك الأسود

وانشدي الوجبه وتلقين اليقين
ذبحة العسكر ووقفات الصمود

بكتب التاريخ لو كنتي تبين
واتركيه ان كان ماعندي شهود

الزمن يرحل وحنا راحلين
والفعل يبقى على ارض الخلود

بس باقي بالقصيده كلمتين
دام غيم الشعر يرزم بالرعود

بهدي الغالي واظنك تفرحين
شيخنا اللي لاح نجمه بالصعود

دنعي راسك على الكتف اليمين
احترام وفوقه التقدير زود

وانعمي بالخير من كف الأمين
كلنا لأمره نجي حسبة جنود

في بحر حبّه اخافك تغرقين
واسأل الله يقلع عيون الحسود

وابله لهل طاب وتشربين
واشهد انه بالعطا ماله حدود

القصايد دايم بذكره تزين
والدعا له بالركوع وبالسجود

ماهي بفرحه ثراها فرحتين
عيدك وعهده عسى عزه يسود