جمر اللواعج - حمد بن عبدالله بن حذيف النعيمي

غصت البحر واغلى الجواهر نقيته
وقصور شعري تنبنى فوق سيسان

يا صاحبي عقد المعاني هديته
ألبس على راسك من الشعر تيجان

ياما معك ليل الهوى قد سريته
تخفي شعورك وانت بالعون شفقان

واليوم وش طاريك واللي نويته
تقول عن حبي تبدلت بفلان

تلميح ولا صدق قلبك رميته
في بحر غيري واستوى فيه ربان

خل الذي حرّك هواك ولقيته
واللي فتح له قلبك اليوم بيبان

يعطيك من صافي الغلا ما عطيته
وانا بعد بلقى عوض فيك خلان

لا شك لك بالقلب قصر ٍ بنيته
ما ينهدم لو ما بقى فيه سكان

يومك معي صافي غرامك شريته
ومن باعني بعته ولا ني بخسران

وابشرك جمر اللواعج طفيته
ولا قضيت الليل لرضاك سهران

انا الذي وردك بكفي جنيته
وما دمت انا الأول فلاني بندمان

الله يتمم لك غرام ٍ بديته
تقول لك عزه وانا اقول لي شان