قمّة الزين - حمد بن عبدالله بن حذيف النعيمي

ياهيه لو صدوا جميع العذارا
يكفي ولو مره بعينك تلدين

سميتهم قدام عينك فقارا
واشوفهم في عين شعري مساكين

عادي اذا هم من جمالك غيارا
اشوف وحده بس ما شوف ثنتين

حاولت اداري بس ما ينتدارا
احساس قلبي دوم بعيوني يبين

من قال من قلبي غرامك توارا
اقول خليهم بالأقوال لاهين

وخليني ارسم صورتك باقتدارا
في بيت يبقى للقصايد عناوين

واحط رمشي حول رسمك اطارا
واغمض عيوني واشوفك ملايين

اسيره انتي والمشاعر تمارا
والناس ماتدري غيابك على وين

وان طاب لك بالعين حسن الجوارا
ياسعدني باللي سكن داخل العين

وان ضاقت عيوني بقلبي مدارا
لو ضاق هذا الكون ماضاق تدرين

نامي وحسادك بهمك سهارا
هنا مكان الزين يا قمة الزين