محرقيّه - حمد بن عبدالله بن حذيف النعيمي

قالت انا محرقيّه بس عشقي للرفاع
اعشق الأرض وثراها وانتمي لأغلى وطن

قلت انا عشقي هواها كان هذا مستطاع
يابحر بحرين قلبي لي بها بيت وسكن

غير خلي هالسوالف جاوبي قبل الوداع
الثواني في حضورك تنشرى بأغلى ثمن

ليه غيرتي الملامح حتى فكري فيك ضاع
وانتي يا احلا الأغاني كم عزفتي لي لحن

يوم قلتي مرحبابك جيت كلي باندفاع
عالقه بالذهن صوره مايغيرها الزمن

جيت ودي بالسوالف غربتي هم وضياع
واختلف ظني بقولة مرحبا يابو حسن

والتفت احسب لغيري وانهزم خط الدفاع
قلت انا من تقصدينه قلتي اقصد من فطن

قلت شفتي كيف ضعتي حتى اسمي ياشعاع
يا شعاع الصبح لأسفر وش بقى بي ما انطعن

وقفي لحظه فديتك كن بالضغط ارتفاع
ذاك اخوي اللي قصدتي والشبه وجه وبدن

كم تغزل فيك شعري وبالسفينه والشراع
ياخسارة قلبي اللي اشتحن بك وامتحن

مابقى غير اني اسأل من شرا الثاني وباع
وش بقى من ذكرياتي مع لياليهن سرن

دنعت لي من حياها وغطت الوجه بقناع
ودبرت ماجاوبتني وخلت بقلبي وهن