مغفورة خطاياك - جوزيف الهاشم
بليله.. عغفله من الأهل.. وبنشوة السكران
دقت الخمر سرقه.. من شفاف عرقانه
وطبعت بوسه.. عاجمر تمّها الدفيان
بلكي من شفافها.. بتدفى شفاف بردانه
وقرّبت دوق العسل.. من خدّها المليان
وأقطف حبّة كرز .. عن خدّها التاني
قالت .. بيي من التعب مرتكي وسهيان
وعيون أمّي.. من السهر دبلانه
ولك يا سارق الكرم .. والناطور غفيان
عناقيد العنب أطيب.. لو تصير بقناني
ومش هيك لازم تعمل .. لو كنت بردان
تلجك داب على الجمر .. وبلحظات ..طفّاني
البدّو يدوق العسل .. من جرّة الجيران
رح ياكل لسع..من نحلات فلتانه
قلتلّها .. خمرك لو تعتّق بينساه الزمان
وما بيعود ينباع ..لو صار مجّاني
وتلجات قلبي .. لو تنزل على النيران
بينطفي التلج.. وبتبقى النار شعلانه
واللي بياكل عسل..من جنّة الرضوان
ما بتفرق معو النحلات..ولا صرخة الجاني
حطّي الجمر عالتّلج.. بكرا بيجي نيسان
نارك بتنطفي.. وبتصبح الجمرات رمدانه
وتلجي بيدوب .. بيعمل بحر من حرمان
وبضلّ العمر..دوّر عخيال مرا هربانه
مش هيك شرع الهوى.. بيعلّم النسيان
العمر عم يمضى .. والقصّه مش حرزانه
بكرا بتوعي بعد ما يفوت الأوان
وبتقولي.. أنا شو عملت بزماني
وبتروحي ..تقعدي عاكرسة الرهبان
وتعترفي لبـونا..وتقولي غلطانه
بالماضي كان في شبّ..اسمو كنعان
فتحلي بواب قلبو..بسّ كنت جهلانه
ولما عالدني وعيت ..متل كل انسان
ما لقيت حبيبي .. الكان يهواني
بطلب منّك يا بــونا.. وبكل ايمان
تصلّي لأجلي ..صلا ربّاني
بلكي بيرجعلي..حبيبي البالأمس كان
يورّق بشعري غزل..ويزهّر غناني
ويكون هالراهب أنا ..واستعوز الشيطان
وبليلة سجود..وصلا..وشموع شعلانه
صلّي أبانا لأجلك..وناولك القربان
وقلك..مغفورة الخطايا..المنّها عم تعاني