ألمزمور السادس - شربل بعيني
ـ1ـ
عَلِّمْني.. سَامِحْ أَعْدائي
الْـ طَعْنُوني بْخَنْجَرْ مَسْمومْ
وْأفْلُشْ صَوْتَكْ عَ أَشْيائي
وْإِرْجَعْ مِتْلِ الْمارِدْ.. قُومْ
ـ2ـ
عَلِّمْني إِتْواضَعْ أَكْتَرْ
كنْتْ.. وْرَحْ إِبْقَى مْنِ تْرابْ
مِسْكينْ الْـ عَ خَيُّو تْكَبَّرْ
مُشْ حاسِبْ لِلْمَوْتْ.. حْسَابْ
ـ3ـ
عَلِّمْني مَشِّي سَاعاتي
قُدّامي.. وِالْغَايِبْ شُوفْ
آخُد مِنَّكْ تِطْليعاتي
وْمِتْلَكْ، خَلْفِ الْواقِعْ طُوفْ
ـ4ـ
عَلّمني.. إِصْدُقْ مَعْ نَفْسي
تا إِصْدُقْ مَعْ كُلّ النَّاسْ
يا عَلي.. وْعَ مْشارِفْ أَمْسي
عَلِّقْلي فَجْري نِبْراس
ـ5ـ
ضايِعْ وَحْدي، وْبَدّي إِحْكِي
تِعْبان مْنِ وْجُودي وْجُودْ
بِتْذَكَّرْ شُو صَابَكْ.. بِبْكي
السَّاعات الْـ ما إِلْها حْدودْ
ـ6ـ
بِرْكُضْ عَ كِتْبَكْ.. إِقْريها
فَسِّرْها عَ ذَوْقي ، وْصيرْ
إِشْرَحْ لِلنَّاسِ مْعانيها
كِيفْ.. وْلَيْش.. مْرَقْت كْبيرْ؟
ـ7ـ
إِنْتَ الْغايِه وَحْدَكْ.. وَحْدَكْ
يا رْفيق الْعايِشْ مَقْهُورْ
فِكْرَكْ نُور مْشَرْقَطْ بَعْدَكْ
يا دِلّ الْما شافِ النُّورْ
ـ8ـ
خِدْني بْإِيدَكْ.. صَوْتي فَحَّمْ
يا أَميرِ الْمُؤْمِنينْ
يَللّي صَلَّى عْلَيْك وْسَلَّمْ
ما بْيِفْزَعْ مِنْ يَوْم الدِّين