مبادىء صدق - محمد الشيخي
مبداى صدق ما زيف الحياه نشقابه
ولو متت ما نرضى اندير عطابه
مازال لى كيان
ومازالت نملك قلب .. (( قلب انسان ))
ومازال عندى للعرب ميزان
بيه كلحد نعرف اسلوب اخطابه
ونرافق الزين ونكره الخوان
ونعرف انرد ه .. كلشى لصوابه
ما نرتضى العطيبه
ومبداى صدق ما نرضى اندير العيبه
واسلوب الحضارة نعرفه ترتيبه
واسلوب القدم قارى افصول اكتابه
وشهير منسبى صافى ومتسميبه
نسيم (( فجر )) من عطره الناس طرابه
عايش على مبداي
عيشت عصر لازيف لاتجداى
وانجيت للمجالس للعلل وازاي
مانى امنللى للخبر هذرابه
وعفيف نفس ماعمره انساق هواي
ورا كل من ساقه هواه وجابه
ولى درب تسابق عليه اخطاى
لا ( عوكره ) لا ( برم ) لا ( نعكابه )
لى مبادى
لا نبيع ناسى لا انخون ابلادى
ونفخر ابماضى دايرين اجدادى
ايام والفخر واعر على جيابه
والناس نحترم فيهم حضر وبوادى
ما ايهمنى (( لون )) البشر و (( ثيابه ))
ما ايهمنى ملبوس
ولا اتهمنى عيشت ثرا وفلوس
ولا تغربى قطعة ذهب مغطوس
الدنيا طويله ريحها قلابه
المهم فالرفقه ايقولوا : (( دوس ))
تلقاه وقت عازاتك سند ترقابه
عايش اسنين دلالى
ولى قدر ما عمره اكرهنى والى
كيف النداوى موكرى فالعالى
جناح حر ماننزل اديار خرابه
وعندى امعا شق السحاب تسالى
انحوز فرق ونعاود انجيب عقابه
وناكل امعلى رايمين اوكالى
عشاق الخلا والصيد والجوابه
مبادى صدق ما زيف الحيا نشقابه
ولو متت ما نرضى اندير عطابه