عليّ خاطرها - محمد الشيخي
العين يالي شالت امعاك نظرها
تواضع الها وانشد علي خاطرها
تواضع الها ياغالى
عليها عليش ابغطرسه متعالى؟؟!!
ما تريد تبقى كل يوم اتشالى
وراك وانت مو حاسب احساب ضررها
العين فارقت مامن اوجوه غوالى
وكم جرح من جر الغلا ساطرها
تواضع الها وانشدها
وسيب اللي قدامها وبعدها
وهيت ما لكلام اللي انجا يسعدها
حتى والوجوه اتبان بموايرها
مانك اللي كي لولى زاهدها
وساحب مع الدنيا ودوج بشرها
ولا نك اللي كي لولي ... جاحدها
احكاية غلا شارب قطير زهرها
واليوم من جفاك ومن عكاس سعدها
العين ضاع يابسها وضاع خضرها
تواضع الها كنيبها
ايروق بالها بالك ايخف نحيبها
لاجل سريبك يا عزيز سريبها
مشغال سر طربتها ,, و سركدرها
لوكان تلقطه من فجرها لمغيبها
تذكارك دوا فى لوله وآخرها
واليوم مى على بالك ولا تدريبها
ولا نك اللي فى حالها " ناكرها "
روف ابحالها
وتواضع الها ونشد ورد اسوالها
لا تريد تبقالك ولا تبقالها
الدنيا فنت واجد ,, قديم جررها
ولاانقولك عينى دوا تلقلها
مامن اللي فيها جرا وقهرها
ماعمر شى ردن اعطاش ارسالها
شراب سيلها عم الابيار غمرها
ولاعمر حطت عالهزيل اثقالها
ايشيل غير فالحمل الثقيل ظهرها
مقادير مازالن اعزوم اجمالها
اشداد ,, فالشدايد كلشى تقدرها
تواضع الها واحكيلها
وجود بيش ماتقدر ابها ,, واصغيلها
واحسب مقاليب الايام وميلها
واعرف البذره قبل ما تبذرها
ونكان مي على بالك العين دليلها
ايعاود على قولت بعد خطّرها
العين يالي شالت امعاك نظرها
تواضع الها وانشد علي خاطرها