مازال قلبى صافى - محمد الشيخي
نظيف درب ديما خاليات اطرافى
مالعيب والخطا مازال قلبى صافى
مازلت ربت عيله
الها عروق دقن فالوطاه اصيله
والها اوزان ماهن شى خفاف ثقيله
انزال حملهن مصلوب فوق اكتافى
ودوم مفتخر لاقط طريق طويله
بيهن ونا دوبين عرقى دافى
على راس شوكه شايلين دليله
حتى انكان مبريّه ورجلى حافى
العز والوفا والقدر نوفى كيله
لصحاب الوفا واللى كريم ايكافى
مازلت من ماضيهم
انجيب فى امواير خير بانن فيهم
اصحاب القلوب الصافية نطريهم
ونعوم فى بحرهم منعدل مجدافى
ولايمل فكرى وين مانغزيهم
ابقولى ومدحى ممتلى مندافى
وروس العرب مازال عهدى بيهم
اصحاب نهج خالى مالعثر والسافى
ويصبح القول انكان موش عليهم
ركيك وهزيل ومو سليم قوافى
مازلت صاحب خبره
امجرب واخذ مالتجارب عبره
ومعلى كلامه كيف وخزت لبره
عندى بال واسع للكلام الجافى
ونطال المرض لازم ايزول ويبره
دواه صبر مالمولا عظيم ايعافى
وحق من نشا فوق العظام الهبره
كريم ربنا عالم السر الخافى
اللى لا نظر لا عقل ما نعتبره
برخص اسوام ايصرفه صرافى
ولا نحسبه صاحب ولا نختبره
نفخت شقا نفخت الجمر الطافى
نظيف درب ديما خاليات اطرافى
مالعيب والخطامازال قلبى صافى