تعبت بحق - أشرف فايز
تعبت بحق
وبأتمني يا قلب الحيره جوايا
تبطل دق
وتخمد ثورة البركان
تعبت بحق
وجوعت أمان
ولساك يا غريب عطشان
ومش قادر تقول اللأ
وماشي ف رحلة النسيان
وشايل كل أحمالك
على ضهرك
وتتعلم تقول نفسك
وتتعلم
تصيغ قهرك
ماترتاح حبه ..
وتسيني أنا أرتاح
كفايه جراح
كفايه النار بتحرقني
ياعم أرجوك
خلاص سيبني
ياكتلة نار ومحشوره
مابين لأضلاع
كفايه اوجاع
فلو تسكت وترحمني
هااكون شاكر
ولو تتباع
هابيعك
واشتري صوان
وأرتاحلى يومين م الغلب
هاابيعك
آه
ياأتعب قلب