مملكة الفيران - أشرف فايز
مات الفار عاش الفار
يبقي زعيم كل الثوار
والثوار الأحرار
هدوا كل حيطان الدار
قال إيه مش عاوزين اسرار
مات الفار عاش الفار
الفار مات عيطوا يابنات
الفار عاش وزعوا شربات
ورشوا الورد والأزهار
مات الفار عاش الفار
هد الحيطه من غير زيطه
واشتري بدله وكام برنيطه
ييجي بكام ميت ألف دولار
مات الفار عاش الفار
الفار خطط قام واتنطط
ويا كلاب السكه وربط
هايبيع ليهم باقي الدار
مات الفار عاش الفار
فاره مهوله زي الغوله
سيدة الفئران الأولي
وسند سيدنا في كل قرار
مات الفار عاش الفار
هي بترسم هو يقسم
والفيران واقفه بتتبسم
هاتك ضحك وهات ياهزار
مات الفار عاش الفار
الفار راح والكل إرتاح
هو إبليس ييجي منه صلاح
ردوا وجاوبوا ياشطار
مات الفار عاش الفار
فار ولئيم عمل تنظيم
عاوز يعمل فيها زعيم
ليه هتافات وغُنا وأشعار
مات الفار عاش الفار
لوحده يفط ويعمل خُط
ويصبح فاره ان شاف القُط
وتجيله رجفه كمان ودوار
مات الفار عاش الفار
فارنا يافارنا يامررنا
لو كان فيه صبر يصبرنا
كُنا زرعنا الغيط صبار
مات الفار عاش الفار
آه يافيران إيه باقي كمان
منتظرين بس الأكفان ؟
وتربه يادوبها تلات تمتار
مات الفار عاش الفار ..