الباشا ماشي بحرس
الباشا ماشي بحرس

ممنوع ياانت تفوت

طب هس واكتم نفس

أو غور في داهيه وموت

هو انت ايه مركزك

ولا ابن مين انت

د هوا باشا انما

انت يا دوب هلفوت

طالبت انا بحقي

اني امشي في الشارع

لقيت كبير الحرس

شاورلي بيمانع

شتمني ما استحملتش

صرخت م القهره

وصوتي اخر شئ

كنت انا ليه سامع

ومابين شتيمه وضرب

وبوليس ونيابه

الاكل اتمنع والشرب

مضوني علي اجابه

اجابة ايه مااعرفش

كان المهم أمضي

يارب احنا في بلدنا

ولا احنا في الغابه

حتة وكيل مرتشي

حربايه ب 100 لون

وقف شويه ومشي

وكأنه سيد الكون

وقاللي احنا حماة البلد

ولأمن الوطن بنصون

كتب كلام علي الورق

طلعني بيهمجنون

هو أمن الوطن في جنوني

أوحبسي من ورا سور

أو حتي قلع عيوني

وابقي جريح مكسور

ما زمان عملتوها

مع نجم ومع سرور

الله يرحمك يا ابو شهدي

كنت اول المجانين

واديني صرت التاني

طب مين عليه الدور؟

أمن الوطن بينا

بس احنا حراسه

حفرنا بايدينا

لنعلي ف أساسه

بدمنا رويناه

اما انتو مصاصه

ايديكوا عايزه القطع

وايدينا يتباسوا

احنا صحاب البيت

لو كنا يوم هلافيت

بكره نعود أحرار

وانتوا اللي تنداسوا ..