أطيب وش - أشرف فايز
صاحبي الصعيدي
أبوشنب وفيه وش
مابيعرفشي يلون رأيه
ولا يعرف إيه معني الغِش
لما بيضحك يبقي بجد
صحيح مبسوط
لو ضحكته تبقى ف أسوان
راح تلقى صداها ف أسيوط
ولما بيغضب
تلقي الوش د بس عينين
ولونهم أحمر زي النار
وتشعر إن الكون دا إنهار
من زلزال أو من بركان
صاحبي صعيدي
لما يحب
يحب بِجد
ولما يخاصم
يبقي طريق وخلاص إتسد
أصله مايعرفشي الوشين
ولا يعرف إيه معني الغِش
تعرفه من بين الملايين
من شنباته و أطيب وِش