حبال الشوق - إبراهيم ابو زيد
لِم ياقلبى حبال الشوق
واشرب كاس الصبر وفوق
بحر الحب مالهوشى موانى
ليل العشق مالهوش شروق
مين صورلك انك تعشق
قلب العشق مافهش عروق
***
قصص الحب ياقلبى خيال
ليه بتصدق كدب اتقال
حتى خياله حزين وبيبكى
شوف كام دمعة فى الموال
اوعى ياقلبى فى دمعك تغرق
لملم كل حبال الشوق
مين صورلك انك تعشق
قلب العشق مالهوش عروق
***
هدّى يادنيا صوراحلامى
هدى فـ ليلى وهدى ايامى
شَجَرِةْ صبر زرعت فى قلبى
طَرَحِتْ شوكها فقلب منامى
حبل الحب يا قلبى بـ يخنق
شوف كام عاشق مات مخنوق
مين صورلك انك تعشق
قلب العشق مفهش عروق