بيبان الشوق
ياللا ياقلبى اسمعنى و فوق
قفلوا كل بيبان الشوق

هما غرامهم زى كلامهم
وانت غرامك دايما فوق

ماهى دنياهم زى قلوبهم
مافيهاش عاشق ولا معشوق

***

سيبك ياللا من الاحلام
كل حكاوى الحب كلام

ليه بتبيع الدنيا عشانهم
سهران دايما مش بتنام

عمر الشمس مادقّت بابهم
ليلهم عمره ماكان له شروق

ماهى دنياهم زى قلوبهم
مافيهاش عاشق ولا معشوق

***

عمر الحب ماكان له سور
يحجز كل خيوط النور

لا دا الحب ياقلبى سفينة
عاشقة موانى وعاشقة بحور

بس تملى الموج فـ بحورهم
يكسر اى شراع للشوق

ماهى دنياهم زى قلوبهم
مافيهاش عاشق ولا معشوق