قلبى العيّل - إكرامي قورة
قلبى العيّل
مش قادر يبعد عنك ثانية
مش قادر وحده يحس بطعم الدنيا
علشان عيل
علشان عيّل
ف عنيه الدنيا بدونك حظ قليّل
بيبُص لضىّ عيونك لما يقوم الصبح
يمد إيديه
لجناين قلبه ويقطف ورد الشوق
يهديه
للحضن الدافى فـ ضل عيونك
لما سوادها يليّل
بيشوفك كل غذاه
مأواه
والكسوة
طب إيه يسوى ؟
إنه يشوف فـ عنيكِ خلاصة نون النسوة
قلبى القادر إنه يكون سى السيّد
نظرة عينه سلاسل حزم تقيّد
حابب إنه يكون العيّل
يعزف حلمه بأوتار عودك
يبدر كل قصايد شعره نجوم على عودك
وأما الدنيا تعانده
يرمى حموله فـ ضل خدودك
لجل يقيّل
قلبى وعارفه
مهما الدنيا تكبر فيا
هيفضل عيّل