قولي لـ سعد - إكرامي قورة
سابوا الحمار يجرى بألوفه الأربعة
واتشطروا ع البردعة
هيه كده
فيه ناس نصيبها الزغزغة وْ
فيه ناس تصيبها الزعزعة
وف وسط وسط المعمعة
خايف عليكِ يا منال
نخلك بيموت والبخت مال
خايف يميل الزير ومانلقاش نواية تسنده
حتى ولا ربطة عقال
واقفة على سكة أمل
بتكفنى بشالك على خد الطريق مليون سؤال
إمتى يجيكِ النصر ؟ والرؤية معادها فات
ولا هلش على عيونك هلال
آه يا منال ...
يا ام العيون فيها التاريخ نايم فـ تعسيلة
بدون حيلة
يبكى على ست المحاسن والجمال
واقفة وكلاب الأرض تنهش لحم عزّك
نبض قلبك ينجرح ينزف يهزّك
والسكوت فـ عيون ولادك
يترسم فـ الضلمة شيخ
بيهز عمة ضعفنا ويقول : حلال
....
آه يا منال
والكل نال منك نصيب
بيزيد على وصف الخيال
والمشكلة تلقى خيوطها فـ جملتين :
" مين خاف سلم "
" واللى اختشوا ماتوا " ... وخلاص
ولأننا .. ما نخافش لكن نختشى
بنموت كمد
لكنهم .. جُبَنا .. يخافوا ما يختشوش
كاتمين على نفس العباد زى الوحوش
قتلوا ولادك يا منال
ولا قامش واحد م الرجال
علشان يحوش
الكل خايف إن شمس الحرب تلسع سحنته
يسقط قناع الجعجعة عن خلقته
يصغر .. يبوووش
يصرخ يا بوووش
ولا يسمعوش
كل الوشوش نظرات تنافق بعضها علشان ريال
مش قلت لك : نخلك بموت والبخت مال
والترس دار
وف كل لفة يدور فـ دار
ويعود إليكِ فـ لفته
قولى ل"سعد" يفوت بجلده
" سعيد" فـ جلده بموت ولا حدش بيسمع صرخته
قولى ل" سعد"
"الثور"أبو " الأبيض" كالوه لما لقوه واقف لوحده فـ دخلته
يا حسرته
اللى يشوف موت الصديق ولا يتعظ من خرجته
يا حسرته ..
يا حسرته ..