سندريلا - إكرامي قورة
كان صديقى
بسمتى فى وقت فرحى وسلوتى فى وقت ضيقى
كان على رأى المثل
رُبّ واحد تلتقاه يصبح شقيقك
أمك إنت ما ولدتوش
تتحوج بعنيه يساعدك
تنضرب يجرى يحوش
كان يقول لى :
كل ما اتمناه يا صاحبى
لقمتين من عيش بلدنا وسندريلا
كنت أقوله :
سندريلا يا مغفل دى بقت زوجة الأمير
كان يرد ودمعته تلخبط ملامحه :
بس محبوسه يا صاحبى
وف بدنها ألف علة
- واحنا مالنا
- احنا مالنا إزاى يا صاحبى ..
دى بتاعتنا
لما نبعد عن عيونها ننكوى حوجة وذلة
فاكر الجذمة اللى كات لابسها فى حفلة أميرنا
كنا شارينه بعرقنا
لجل ما يشوفها الأمير
كل واحد قدم اللى قدره ربه عليه
كنا نطلع كلنا صحبة وشلة
صوتنا كان لحنه لذيذ
ياعزيز .. يا عزيز
شمسنا حامية علينا ونفسنا فى حته ضلة
ياعزيز
كُبة تاخد اللى يسجن سندريلا
واشترى لها الجذمة ناسنا الطيبين
بس صدفة .. صدفة بحته ..
كان مقاسها أربعين
قسموا الأرقام عليهم يوم زفافها وْ
جمعوا النقطة الكبيرة م الغلابة
واحنا مش لاقين ما بينا
على بابا
كنت أقوله : بس يا مستبيع إنتَ
الحيطان ليها ودان
سندريلا ملكه وحده وهو حر
لونعيش من غير عيونها إيه يضر
طول ما قوتنا عندنا
دا لسان العقل بيزعق :
وطّوا صوتكم ..
صهينوا حبة وحاسبوا
بكرة رب الكون يحاسبه
كان يقول لى رحمة الله عليه
والقيود باكية فـ إيديه
: أصلك إنت
لسه ما تعرفش ضحكة سندريلا
يوم ما تضحك تلمح الفرحة يا صاحبى
من عنيها الحلو هلّة
وامّا تبكى يبقى طعم الدنيا ...
لا مؤاحذة .. دايماً القافيةبتحكم
واللى يحكم تبقى ملكه السندريلا وهو حر
واللى مات علشان عيونها برده حر
كان صديقى وافترقنا
اتأسرت فـ دنية الخوف الغبية
أما هوه .. قام جرى للأخرة حر