باضيع مني - إكرامي قورة
(باحس إنى باتوه وياك )
قالتها .. وضعت انا منّى
وزادت سكتى أشواك
وكان ردى .. وإيه يعنى
قصايدى لما باشرحها
يقولوا إنها إنتِ
وعينك لما بالمحها
يزوّد سحرها صمتى
غرامك داب فـ تكوينى
ونار بُعدك بتكوينى
ولو قرّبت من عينى
باحس انى باضيع منى
بحبك ؟ .. أه ما بنكرشى
واغير منّى على عيونك
هاغطيكِ أنا برمشى
واعيش بالحب مجنونك
عيونك غيروا حالى
صحاب حلّى وترحالى
ليلاتى يدوبوا فيّا
وخلّوا الحب موالى
يانورعينى .. وروح روحى
طبيبى إنتِ وجروحى
ويوم بالحب ما تبوحى
هاضيع يا منيتى منّى
دا لو كان البعاد قدرى
وأكون وحدى أنا بكره
يزيد من دمعتى صبرى
واعيش عمرى على الذكرى
ومهما الدنيا تبعدنا
وتبعد فى خطاوينا
هاعيش عمرى على عهودنا
وأحلامنا وأمانينا
ولو دارت بنا الأفلاك
هتفضل غنوتك لحنى
( باحس انى باتوه وياك )
واحس إنى باضيع منى