جيّ تاني - إكرامي قورة
جيّ تاني
لجل أسأل بس يا أشعر حورية
ليه حمام البر ما عدش بيسقف ؟
ثم فين هوه حمام السمسمية ؟
والإجابة
كلنا حافظنها صم
كلنا عايشنها غم
صوتها غز القلب يوم الكرب غزّة
هزُّه هزّة
صحى في نبضه شعور بيضخ عِزة
كان مناه ينهض عشان ما يشد أزر اللي بموت
في حضن ( غزة )
الحمام رفرف يا ستي
الحمام الحر رفرف للخلود
واللي باعوا الأرض بيبنوا
ألف برج حمام مطاطي ع الحدود
للصهاينة واليهود
نطلقه حول الموائد
لجل ما يقولوا كلام
لجل ما يعيدوا الكلام
الصهاينة يغيروا مليون نظام
واحنا إحنا
لسه بنربي حمام
لسه بنربي حمام
تدبحه في غزة سكينة السلام