رباعيات الرجوع - إكرامي قورة

عيوني وخداني لبحور عنيك السود
أعزف فـ ألحاني وأجعل فؤادي عود

وبرغم إن الرجوع بيصحّي فيا دموع
وبرغم طعم الغرق برضه باحِنّ واعود

معرفش إيه السبب خلاني أندهللك
شخصك يا كل المنى ما اعرفشي أم شكلك

ولا حتى ليه الفؤاد ينبض على مهله
واما يحسك بالهوى ينبض على مهلك

سكران بدون الكاس توهني خمر العين
دايب من الإحساس لكن مليش قلبين

لو القلوب تتشرى أجمع قلوب الناس
واهديك في كل لحظة م القلوب ملايين

الشوق في همس العيون واضح ولا يخفى
ولو غرامك مرض قلبي مالوش يشفى

د إن غربوني عن الأرض اللي عاشقها
هادعي يكون في عينيك السودة دي المنفي

عشرين سنة وقلبي مقفول بست اقفال
عمره ما يوم انفتح من رقة أو لجمال

لكنه لمّا لمح طيفك يا نور عمري
بصيت لقيته فتح كل البيبان في الحال

حبك يا نور العيون حيرني أنا فيّا
خلاني أشوف الهنا ودموعي فـ عنيّه

يا صحابي لو م الهوى مت اكتموا خبري
مين مات شهيد الغرام أبدا مالوش ديّة

باقطف ورود الهوى واهديك يا عمري
ومن بنات البشر سلمتلك أمري

مقدرش ألم النجوم وازرعها في عقدك
لكن بكل اختيار باهديك أنا عمري

يا نجمة يا صافية عاشق مواويلك
مهما يطول النهار راجع أنا لليلك

وإن عشت في الدنيا في الجنة ونعيمها
راح أسيب بلاد الهنا يا عمري وأجيلك

راجع وف عيوني الفرحة بتغنّي
والقلب داب م الهوى حتى اسأليه عنّي

مهما يطول البعاد باشتاق لحضن العين
كأني طفل اتولد واتربى فـ الننّي