البنت - جمال مرسي
البنت
قايمة تستحمى في الشعاع
تغزل خيوط الفجر
تلبس هدمة الصبح الجميل
تفرد جدايلها الطويله عـ البقاع
بتغنى غنيوة الأمل
للفارس الشهم البطل
الفارس اللي طال على البنت انتظاره
اللي بحصانه صال و جال
و حقه واخده بالدراع
رغم اللي غشه و الللي باع
و برغم صوت الحق في الدنيا اللي ضاع
البنت لسه لتوها
صاحيه تسرّح شعرها
أسود طويل
و كأنه ليل
و خدودها مصبوغه بلون دم الشهيد
و الشفايف من ورود أرض الجنوب
لما تميل وقت الأصيل
البنت دي مش أي بنت ف . شكلها
و لا أي أنثى ف. طبعها
كام عمرها ؟
من عمر لبنان الجريح
ايه جنسها ؟
من جنس تاني غير بنات حوا اللي مرّوا من هنا
و الدليل ؟
الدليل ان اسمها
:
:
:
:
:
:
:
بنت الجبيل ..