عندِك كبريت ..اولّع - سمير الأمير

عندِك كبريت ..اولّع
يا امريكا اللاتينيه
جو الكفاح مسّقع
فى المنطقه العربيه
مع ان العيشه تفقع
وقلوبنا مستويه
وناس حيتان بتشبع
وناس تانين هفيه
وكل يوم بنركع
زى عبيد الوسيه
وامتى الشمس تطلع
بالنور وبالحرية
ما تبعتلينا مصنع
ولا خسارة الهدية
ف ناس لا عايزه تسمع
ولا تفهم القضية؟؟
عندك كبريت.. اولّع
يا امريكا اللاتينية
فى كل اللى كتبته
حتى القصيده ديّه؟؟