غمض عنيك - سمير الأمير
غمض عنيك يا بوليس
واقفل ودانك شويه
دى بلادنا حتروح فطيس
من غير نفس حرية
****
غمض عنيك ع الناس
فتّحها ع الحراميه
وامسك ميزان حساس
بالعدل والوطنيه
***
بيساوى كام الضمير؟
عليك يارب العوض
ده الوضع اصبح خطير
بعد البوليس ما قبض!!
****
غمض عنيك يا بوليس
عايزين نشوف سكتنا
تعبنا م التحسيس
والضلمه خنقتنا
**
كفاياك بقى تهويش
اقفل ودانك وسيبنا
مدام خدمنا الجيش
طب ليه تعذبنا؟
**
مش متنا فى النكسه
وعبرنا فى التحرير
وما نابنا غير وكسه
م الفقر والتكدير؟
***
غمض عنيك بقى عيب
ده احنا بقينا عرايا
وزهقنا م التعذيب
والمحكمه والقضايا
***
ده ما عادش نافع زوق
ولا انت فاهم كلام
بكره يا ظالم تدوق
مُر البكا والآلام
***
وساعتها فتح عنيك
واصرخ وقول ده حرام
ومين حيسأل فيك
وانت ف قفص الاتهام؟!